Октябрь 17-де бистиң чуртувуска Адалар хүнүн байырлап эрттирер. Бо байырлал чаа-даа болза, кончуг чугула. Чүге дизе ада кижи дээрге азыракчы, камгалакчы, өңнүк, сүмелекчи боор. Адалар хүнү таварыштыр Республиканыӊ К.И.Чуковский аттыг уруглар ном саӊы тускай делгелге белеткээн.

 

Адалар дугайында номнар дыка хөй. Садик назылыг болгаш 10 харга чедир уруглар килдизинде делгетинген үш онза солун ном-биле силерни богун таныштыраал. «АЧАЙ ОРАЙ КЭЭРГЕ» деп номну япон чогаалчы Нобуко Итикава бижээн. Тайылбыр сөзүнде мынча деп каан: «Ачам ажыл соонда орай кээрге, дыка муңгараар мен. Ойнаар, кады агаарлаар азы хөглээр дээрге удуур үе дүжүпкен боор. Чогум мен бодаарымга ачамныӊ мындыг орайтаары бир-ле чылдагаанныг. Ол делегейде эң терең үңгүрнү казып турган боор. Чааскаан база эвес. Ачамга дедир-даваннар, кымыскаяктар, шыйлашкыннар дузалажып турган чыгыы. Ынчангаш мээң ачам чер шимчээшкини болуп турда, ол амытаннарның амы-тынын камгалаан. Азы-ла орайтааны азып каан бичии оолду бажыңынче чедирип чораан ирги бе? Машинага база эвес, тускай хемеге улуг хөлдүң өске эриинче чедирип турган боор. А ол бичии оол анаа эвес болган, чаш илбичи болган шээй. Азы ачам черлик чекпелер-биле волейбол ойнап турган ирги бе?... Ийе, ачам чамдыкта орай чанып келир. Ынчалза-даа ол келгеш, меӊээ дыка солун төөгүлер чугаалап бээр. Ону дыка манаар мен…»

 

«АЧАМ БИЛЕ АК-КӨК ДӨҢНЕР КЕЗИП ТУР МЕН…» деп ном бичии Марьяша деп кыс уруг болгаш ооң адазыныӊ дугайында. Олар бот боттарынга дыка ынак болгаш кады ойнаар, тениир, дыка чугаалажыр. Марьяша ачазын эӊ чоок эжи кылдыр санаар. Дыка солун төөгүлерни ачазы чугаалавышаан, альбом арыннарынга чүнү-даа чуруур. Будуктар азы карандаштар-биле ол чайгы чаъсты, хат-шуурганны, даң бажын болгаш ак-көк дөңнер кезип турарын магалыг чуруптар. А кара самбырага болза ачазы тергиин чараш узун чаштыг Куу-кадынны чуруптар. Ынчалдыр ачазы Марьяшага кайгамчык, чогаадыкчы бодалдан тургустунган октаргайны ажыдып, көргүзүп турар. Ол өртемчейде кандыг-даа чүзүн-баазын дүрзүлер бар, чуруктар дирлип келген-даа ышкаш болур...

 

«АЧАМ-БИЛЕ СТАДИОНГА» деп номнуң кол маадыры – Славик деп бичии оол. Авазы суур бада бээрге, ол адазы биле арткан. Ачазы оглун ажылынче кады эдертир апарган. Ажылдаар чери дээрге стадион, чүге дизе Славиктиң ачазы тренер. Аңаа бичии оол ооң бетинде билбес турган чүүлдер көрүп, сонуургап, шенеп эгелээн. Чижелээрге Славик спорстменнер-биле найыралдажып алган: халыкчы биле, штангист болгаш эштикчи биле. Оон бир катап Славик ГТО дужаар мен, белен мен деп база чүткүп турган. Оон бир хүн улуг бассейнге эштиир мен, мотоцикл мунар мен, футболга судьялаар мен дижик. «Свистогум база бор, бо көрүңер!» деп чугаалап база турган ол. Славиктиң бодалы болза мындыг: «Ачам ышкаш угаанныг болгаш дидим мен!».

 

Бо номнар садик назылыг болгаш 10 харга чедир уруглар килдизинде бар. Ном саӊы понедельниктен субботага чедир ажылдаар. Адрези: Кочетова, 34, Московская, 110. Телефоннары: 3-40-82, 5-23-55.

 

«Центр Азии» солундан чурук