Декабрь 10-да, Кызыл хоорайның 5 дугаар гимназиязынга Тыва Республиканың Улустуң чогаалчызы Черлиг-оол Чашкынмаевич Кууларның 85 харлаан оюнга тураскааткан «Шүлүкчу, тоожучу, эртемден» деп солун литературлуг шак болуп эрткен!

Хемчегниң эгезинде К.И. Чуковский аттыг уруглар ном саңының чурт-шинчилел болгаш чогаал килдизиниң кол библиотекары Өнермаа Куулар, Тыва Республиканың Улустуң чогаалчызы Черлиг-оол Чашкынмаевич Кууларның допчу намдары болгаш чогаадыкчы ажыл-ижи-биле уругларны таныштырып, чогаалчының делегейин таныштырган.
Куулар Черлиг-оол 1940 чылдың декабрь 10-да Чөөн-Хемчик кожууннуң Хорум-Даг сумузунуң Шеми-Аксынга төрүттүнген. Чогаал ажылын 1960 чылда эгелээн. Шүлүкчү, прозачы, драматург, очулдурукчу. ССРЭ-ниң Чогаалчылар эвилелинин кежигүнү, Тыва Республиканың алдарлыг чогаалчызы, Тыва Республиканың Улустуң чогаалчызы, Культура болгаш кино туризм яамызының C.A. Сарыг-оол аттыг чогаал шаңналының лауреады.

2-ги класстың өөреникчилери презентация, чечен чугаалар болгаш хөглүг мөөрейлер ачызында уран-чүүлдүң хуулгаазын делегейинче шымнып, шүлүк чогаалынче, тоолдарның сюжеттеринче база тыва литератураның ханы овур-хевирлеринче шымнып киргеннер.

«Ак хураган» деп баллада болгаш «Койгун канчап дириг артканыл?» деп чечен чугааны уруглар улуг сонуургал-биле дыңнап сайгарылгаларга идепкейлиг киришкеннер.

Тыва Республиканың алдарлыг чогаалчызы, Тыва Республиканың Улустуң чогаалчызы Черлиг-оол Чашкынмаевичиниң солун намдар төөгүзүнүң, ажыл-амыдыралының дугайында база оон тыва шүлүк делегейинде онза аян хөөннүг шүлүктерин, проза чогаалдарын сонуургап номчууру-биле, силерни Республиканың К.И.
Чуковский аттыг уруглар ном саңының чурт шинчилел
болгаш чечен-чогаал килдизинче чаладывыс!

#Чуковка17 #Черлиг-оолЧашкынмаевич #85хар #Юбилей #библиотекиТувы