Сүт-Хөл кожууннуң төпчүттүнген ном саң шугумунуң информастыг килдистиң эргелекчизи «Тывызыксыг Тыва» деп бичии уруглар дамчыдылгазының тургузукчузу Монгуш Айдаш Орлан-оолович база бир чаа чугула төлевилелди кылып дооскан. Ажылдың түңнелин чоргаарал-биле бараалгадып тур бис!
Силерниң кичээнгейиңерге «Таныжыңар уруглар!» деп төлевилелдиң «Чеди чүзүн мал» деп бичии уругларга өөредиглиг биидеңни таныштырып көрээлиңер. Ында тыва чоннуң азырап чоруур 7 чүзүн малының болгаш оларның төлдериниң дугайында көргүзүп, тайылбырлап турар.

Төлевилелди амгы үениң ажы-төлүнге тускай, эптиг кылдыр тургускан, олар делегей четкизи дамчыштыр сонуургаан чүүлдерин идепкейлиг билип ап турарлар. Оларга биидең таварыштыр бистиң чер чурттувустуң байлаан бичии уругларга чедирериниң аргазын тып ажылды чоргускан. Ам боттарывыстың төрээн тыва дылывысты азырап чоруур мал- маганывысты өөренири солун болгаш улам чедингир апарган!

Салым-чаяанныг кижилерниң кады күжениишкиннериниң ачызында культуравыстың байлаан салгалдарывыска дамчыдар аас-кежиктиг бис. Төлевилелдиң онза чоргааралы-хөгжүм кезии! Ырыны тургузарынга «Сүт-Хөлдүң чалгыглары» аттыг чечен-чогаал каттыжыышкынының кежигүнү Элдеп Михайловна Ондар сөзүн чогаадып тургускан, аялгазын төлевилелдиң тургузукчузу Айдаш Монгуш чогаадып кылган, а кайгамчык ырыны Кара-Чыраа сумузунуң «Монгуш Дарый» аттыг көдээ культура бажыңының уран-чүүл удуртукчузу Сайдай Сайдашовна Ондар ырлап күүсеткен. Үн бижидилгезин кожууннуң культура бажыңының уран-чүүл удуртукчузу Күндел Эзир-оолович Хөвендей кылган.

Бо төлевилел тыва дылды кадагалап арттырарынга, болгаш улам хөгжүдеринге улуг үлүүн кииреринге сеткиливис ханызындан бүзүреп идегээр дир бис.