Тыва Республиканың культуразының алдарлыг ажылдакчызы Комбу Дойдулович Бижек-биле август 23-те Эрзин кожууннуң К.Д. Бижек аттыг уругларның төп ном саңынга «Төрээн черим, чурээм согуу» деп чечен-сөстүг ужуражылга болуп эрткен.

Ужуражылганың кол маадыры, Комбу Дойдулович Бижек – салым-чаяанныг шүлүкчү, очулдурукчу, чурукчу, майор, кызыгаар шерииниң ажылдакчызы. Тыва Республиканың Чогаалчылар эвилелиниң, Россия Федерациязының Чурукчулар эвилелиниң кежигүнү. Москва хоорайда Тыва Республиканың бүрүн эргелиг төлээ черин тургусканнарның бирээзи.

Ужуражылганың келген аалчылары Тыва Республиканың культура сайыды Виктор Сергеевич Чигжит, Республиканың К. И. Чуковский аттыг уруглар ном саңының удуртукчузу Сылдысмаа Борисовна Лопсан, Тыва Республиканың культура яамызының тудуг килдизиниң кол специализи - Александр Санданович Санчат, Тыва республиканың улустуң чогаалчызы, Тыва Республиканың культуразының алдарлыг ажылдакчызы Кара-Күске Күнзекович Чооду, Россия Федерациязының алдарлыг журнализи, «Алдын-Кушкаш» уруглар сеткүүлүнүң кол редактору, Тыва Республиканың болгаш Россияның чогаалчылар эвилелиниң кежигүнү Александр Сан-оолович Шоюн, Россия Федерациязының журналистер эвилелиниң кежигүнү, Тыва Республиканың болгаш Россияның чогаалчылар эвилелиниң кежигүнү, Тыва Республиканың культуразының алдарлыг ажылдакчызы Лидия Херлииевна Иргит, Эрзин кожуун чагыргазының культура болгаш туризм эргелелиниң начальниги Ольга Васильевна Куулар болгаш Эрзин, Нарын, Мөрен суурлардан чогаалчының мөгейикчилери келгеннер.

Ужуражылга үезинде аалчылар Комбу Бижектиң ажыл-ижи-биле таныжып, ооң Тываның литературазынга болгаш культуразынга киирген үлүг-хуузун үнелээр аргалыг болганнар. Бо болуушкун салгалдар аразында арга-дуржулга солчулгазының, культурлуг харылзааны быжыглаарының болгаш Тываның уран-чечен өнчүзүн нептередириниң шөлү апарган. Культура яамызының сайыды Виктор Сергеевич Чигжит Комбу Дойдуловичти “Культураның болгаш уран-чүүлдүң хүндүлүг хоочуну” деп хорек демдээ биле шаннаан. Эрзин кожууннуң удуртулгазы «Эрзин кожууннуң алдарлыг шүлүкчүзү» деп хүндүлүг атты база тывыскан. Бо бедик үнелел Тываның литературазының болгаш уран чүүлүнүң хөгжүлдезинге ооң ажыл-ижиниң болгаш хууда киирген үлүг-хуузунуң чугулазын онзалап көргүзүп турар.

#Чуковка17 #КомбуДойдуловичБижек #ужуражылга #библиотекиТувы