Апрель 11-ниң хүннүнде Республиканың К. И. Чуковский аттыг бичии уруглар ном саңынга, чурт-шинчилел болгаш чогаал килдизинге, салым-чаяанныг, сураглыг хөгжүмчү, композитор, Тыва Республиканың болгаш Таңды кожууннуң культуразының алдарлаг ажылдакчызы, Россия Федерациязының композиторлар эвилелиниң кежигүнү, Сергей Иванович Бадырааныӊ 75 харлаан оюнга база эртемден, шинчилекчи, этнограф, төөгү эртемнериниң доктору, Тываның Дээди хамы, Тываның Улустуң чогаалчызы, Тыва Республиканың Баштыңының – Чазааның даргазының С.А. Сарыг-оол аттыг чогаал шаңналының лауреады, «Улустарның найыралы», II-ги чаданың «Ада-чуртунга ачы-хавыязы дээш», I-ги чаданың «Буян-Бадыргы» орденнерниң эдилекчизи, «Делегейниң дириг эртинези» деп бүгү делегейде хүндүлүг аттың эдилекчизи Монгуш Борахович Кенин-Лопсанның, мугур 100 харлаан оюнга тураскаадып, «Дыӊгылдайлаан ырыларныӊ сөӊнекчизи» деп чогаадыкчы ужуражылганы эртирген.

 

Хемчегниң кол маадыры композитор Сергей Иванович Бадыраа-биле Кызылдын номери 12 дугаар “Дайынчы-интернационалист Ю. В. Кара-оол” аттыг школаның 6 «а» клазының өөреникчилери ужурашканнар.

 

Удуртукчу башкы Чинчи Валерьевна Ооржак бичии уругларның уран-чүүлге база номчуттунарынга сонуургалын оттуруп, бичии чаштарга хөй-хөй ырыларны бижип чоруур композиторувусту таныштырып, солун ужуражылга-хемчегни удуртуп, чедип келген.

 

Хемчегниң кол маадыры Сергей Иванович, бодунуң чаш чораан үелерин, амыдырал-чуртталгазын болгаш амгы үеде кылып турар ажыл-чорудулгазының дугайында, кажан, канчап ыры бижип эгелээнин төөгүп, оон-даа өске бодунуң солун, уттундурбас төөгүлерин чугаалап, Республиканың К. И. Чуковский аттыг бичии уруглар ном саңының ажылын бедик үнелеп, өөрүп четтиргенин илеретпишаан «Хамнаарак» база «Угулза» деп 2 номун белекке берген.

 

Аалчывыс, композитор С. И. Бадырааның «Хамнаарак» деп уругларга бижиттинген чыынды ырларындан бичии болгаш элээди уругларга Монгуш Борахович Кенин-Лопсаннын «Чөрүү сен» база «Дүңгүрнүң ырызы» деп бөлүк шүлүктерден бижиттинген «Чеди-Хаан», «Дидир-дидир», «Халак-Халак» деп ырларныӊ хөгжүм үделгези-биле өөреникчилер-биле чурт-шинчилел болгаш чогаал килдизиниң кол библиотекары ϴнермаа Куулар кады ырлажып, күүсеткеннер.

 

Ном саңынче билдингир композиторувус С. И. Бадырааны чалаанывыс уругларга солун болгаш өөредиглиг болганын келген аалчылар демдеглээн. Ужуражылга соонда, улуг композиторувус-биле төөгүлүг чуруктарны тырттырышкан.

 

#Чуковка17 #ЫрыХогжум #КенинЛопсан #БадырааСИ #библиотекиТувы