Чыл санында октябрь айда база бир чугула өг-бүле байырлалың – Ада хүнүн демдеглеп турар. Байырлалды өг-бүлениң болгаш уругларның кижидилгезинге төрээн ада кижиниң чугулазын бедидер сорулгалыг эрттирип турар.

Республиканың уруглар ном саңында чурт-шинчилел болгаш чогаал килдизинде «Тергиин адаларга алдар!» деп ном делгелгези делгеттинген.

Ында адаларга хамаарышкан онза солун номнарны делгээн: Шаңгыр-оол Суваңның чечен болгаш баштак чугаалары «Ачамның шолазы»; Экер-оол Кечил-оолдуң шоодуглуг, баштак, тоолчургу чугаалары «Девидээн ада»; Борис база Буян Казырыкпайларның эр улустуң мөзү-бүдүжүнүң дугайында «Эр чол» дээш оон-даа өске номнар делгеттингенин сонуургап, ном-саңынче кээп көөрүңерни кыйгырдывыс!

Хүндүлүг бистиң адаларывыс!

Кайгамчык байырлал – Ада хүнүнде чүректиң ханызындан эң-не чылыг, чымчак күзээшкиннерлиг байырны чедирип тур бис! Өг-бүледе ава, өг-бүлениң одааның кадагалакчызы, а ада бодунуң социал ат-алдары-биле база бүдүжүнден кол камгалакчызы болгаш өг-бүлениң азыракчызы болур. Ада болуру чер кырында эр кижиниң эң-не төлептиг болгаш чугула хүлээлгези. Ынчангаш чугле ада кижи чаш уругнуң шынчы, патриотчу, чаагай сеткилдиг болгаш эр соруктуг болур шынарларны тургузуп, хевирлээр.

Шупту адаларга быжыг кадыкшылды, аас-кежикти, сайзыралды, чаагай чорукту кузедивис! Бажың-балгадыңарга кезээде өөрүшкү болгаш чаштарның каткызы долуп турзун!

#Чуковка17 #АдаХүнү #НомДелгелгези