Зинаида Серен-Чимиттиң чырыкче үнген чаа номнарының таныштыралгазы апрель 29-та болуп эрткен. Актаашкын езулалынга Республиканың уруглар ном саңының ажылдакчылары болгаш бичии номчукчулары киришкен.

Зинаида Салчаковна Серен-Чимит Россияның болгаш Тыва Республиканың Чогаалчылар эвилелдериниң кежигүнү, педиатр эмчи, классиктиг гомеопатияның доктору.

2022 чылда чогаалчының «Ойнаарактарның хомудалы» биле «Хуулгаазын ак аъттыг кыс» деп номнары чырыкче үнген. Номнарның актаашкын езулалы А.С. Пушкин аттыг национал ном саңының номчулга залынга болуп эрткен. Аңаа Тыва Республиканың чогаалчылар эвилелиниң кежигүннери, Зинаида Серен-Чимиттиң төрелдери, уруглары, уйнуктары болгаш чоок эш-өөрү кээп киришкен. Тыва Республиканың чогаалчылар эвилелиниң даргазы, журналист болгаш чогаалчы Саяна Өндүр баштайгы сөстү ап, актаашкын езулалын ажыткан.

Чогаадыкчы ажылын Зинаида Серен-Чимит школачы чылдарында эгелээн. 2010-2012 чылдарда уйнуктарлыг апаргаш, кырган-ава олардан улуг идигни ап, катап база чогаадыкчы ажыл-ижинче хайныгып кирген. Ол үеден бээр Зинаида Салчаковна 5 номну чырыкче үндүрген. Бөгүнгү актадып турар номнарны чырыкче үндүреринге Чогаалчының улуг оглу дузазын каткан.

Актаашкын езулалынга Республиканың уруглар ном саңының даргазының оралакчызы Өнермаа Амырбит "Ойнаарактарның хомудалы" деп бичии уругларга бижиттинген номга үнелелди берген. 22 шүлүк кирген чаштар номунуң дылы чедингир, билдингир, номчуттунгур, шээжилээри белен деп онзалаан. База уруглар ном саңының номчукчу уруглары номдан 2 шүлүктү чыылган чонга бараалгадып күүсеткен.

Чогаалчы Зинаида Салчаковна Серен-Чимитке чедиишкиннерни күзеп, хөй номчукчулуг болурун йөрээдивис!