2021 чыл Тыва Республикага онзагай утундурбас төөгүлүг чыл – Тыва Арат Республиканың тургустунганындан бээр 100 чылы-биле кады ону демдеглеп эрттирип турар бис.
Чүс чыл бурунгаар – 1921 чылдың август 15-те бистиң чонувустуң салым-чолунга төөгүлүг салдарлыг болуушкуннарның бирээзи – Азияның чиге төвүнге бот-догуннаан күрүне тыптып келген. Төөгүлүг болуушкун Тываның Россия-биле кады хөгжүлдезиниң эгезин салган. Тыва чон шаг- төөгүден бээр кайгамчык мерген угаанныг, биче сеткилдиг, хундулээчел, топтуг- томаанныг чон бис. Бистер, амгы үениң салгалдары өгбелеривистиң төөгүзүн, чаңчылдарын утпайн, хумагалап сактып чоруур ужурлуг бис.
Ынчангаш төөгүлүг чылга тураскааткан «Вековая история: ровесники ТНР» («Чус чылдың төөгузу: ТАРның үежилери») деп 1921 чылда төрүттүнген, бо чылын 100 харлаар турган онзагай кижилерниң допчу-намдарын чыгган библиографтыг айтыкчыны К. И. Чуковский аттыг уруглар ном сан чериниң библиографтары тургузуп үндүрген. Кол сорулгазы - өзүп орар аныяк өскенге бистиң өгбелеривистиң дугайында билип, оларны танып, оларга чоргаарланып, эрес-мөзүлүг, чурттунга ынак кижилер болурунга чижек кылдыр көргүзүп турар. Олар Тываның төөгүзүнге база хөгжүлдезинге улуг үлүүн киирген деп чүүлүн өгбелеривистиң допчу-намдарында бижип бадыткап турар.
Ынчангаш богун декабрь 10-да бистиң уруглар ном сан черинге «Чус чылдың төөгузу: ТАРның үежилери» деп допчу-намдарлыг библиографтыг айтыкчының презентациязы болуп эрткен.
Бо байырлалга улуг үлүүн киирген Тыва Республиканың культура болгаш туризм яамызы, Тываның национал архиви, А. С. Пушкин аттыг Национал ном саны, Алдан-Маадыр аттыг национал музейинин төлээлери болгаш номда кирген кижилернин салгалдары аалчылар бооп келген. Олар боттарынын номга хамаарышкан саналдарын киирип, өгбелериниң дугайында сактыышкыннарын чугаалап улуг сонуургал-биле унелээн.

#культуратувы #Библиотекитувы #Чуковка17 #Ровесникитувы #Указатель #презентация #100летиеТНР #ТНР