Бижек Комбу 1937 чылдыӊ март 1-де ТАР-ныӊ Эрзин суурунга төрүттүнген. 1959 чылда Тываныӊ көдээ ажыл-агый техникумун дооскаш, күш-ажылчы намдарын өскен-төрээн колхозунга бухгалтер, экономист болуп ажылдап эгелээн. 1966-1970 чылдарда Ленинградка профэвилелдерниӊ Дээди школазын дооскаш, Эрзинниӊ райкүүскомунга килдис эргелекчилеп, Тыва областыӊ профэвилелинге янзы-бүрү албан дужаалдарга ажылдаан.
1974-1989 чылдарда Москвада Моссовет аттыг Дээди кызыгаар училищезинге очулдурукчу башкы бооп, очулдурукчулар бюрозун удурткан. 1991-1996 чылдарда РФ Президентизиниӊ чанында Тыва Республиканыӊ доктаамал төлээ чериниӊ тускай эртемниг мергежилинге ажылдаан.
Комбу Дойдуловичиниӊ чогаалга сонуургалы школачы чылдарында-ла эгелээн. Баштайгы шүлүктериниӊ чыындызы
"Казыргы" деп аттыг бичии уругларга 1983 чылда унген. Дараазында чогаалдары "Үлүүм"(1986),"Хүн-биле чаштынчып ойнап тур бис" (1991),"Алдын баглааш"(2004) орус дылдарда база "Булак" (2018)шүлүктерлиг ному үнген. Бичии уругларга чогаал бижиири амыр эвес. Уругларга билдингир, кыска, чечен-мерген дыл-биле дыка хөй шүлүктерин бижээн. Ооӊ шүлүктерин республика солуннарынга,"Улуг-Хем" альманахка,"Башкы" сеткүүлүнге, Совет Армияныӊ "Кызыл сылдыс" солунунга, "Кызыгааржы" сеткүүлге парлаттынган. Ол моол дылдан Тыва дылче "Моолдуӊ чажыт төөгүзү" деп номну очулдурган.
Комбу Дойдул оглу Бижек – шүлүкчү, очулдурукчу, чурукчу, майор, кызыгаар шерииниӊ ажылдакчызы.Тыва Республиканыӊ Чогаалчылар эвилелиниӊ, Россия Федерациязыныӊ Чурукчулар эвилелиниӊ кежигүнү. Москва хоорайда Тыва Республиканыӊ бүрүн эргелиг төлээ черин тургусканнарныӊ бирээзи.
2012 чылда Эрзин кожууннуӊ төп уруглар саӊынга Комбу Бижек Дойдуловичиниӊ адын тывыскан.
Авам ышкаш менээ ынак,
Авам ышкаш тергиин чараш,
Ындыг кижи кажан шагда
Ылап черле турар деп бе?

Чараш хепти, ойнааракты
Чагып-даа бээр, садып-даа бээр.
Ховар, чылыг бопуктарны
Холу-биле даарап-даа бээр.

Эрзин кожууннуӊ төп уруглар саӊынын информациязы-биле

#Культуратувы #Библиотекитувы #Чуковка17 #БижекКомбу #Эрзин #детская_библиотека #юбилей