Уругларның чогаалчызы Соскалдай Дамбаевич Саая 1932 чылдың январь 1-де Чөөн-Хемчик кожуунга, Хөндергейге төрүттүнген. Ооң ажыл-амыдыралы өзүп орар салгалды өөредир, кижизидер буянныг ажыл-херекке тураскаадып Барун-Хемчик, Мөнгүн-Тайга школаларынга башкы ажылынга балалбас исти арттырган. Школаларга ажылдап тургаш, уран-номчулга, шииге ойнаарынга салым чаяанныын көргүскен. Мугур-Аксының культура бажыңының улусчу театрының режиссерунга үр үе ажылдаан. Чогаалчы чогаал ажылын 1960 чылдарның эгезинде эгелээн. Ооң шүлүктери, баснялары, баштак чугаалары «Шын», «Тываның аныяктары» солуннарга, «Улуг-Хем» альманахка парлаттынган. Ооң «Чагыг» деп ному Эдуард Донгактың редакторлааны-биле 1982 чылда чырыкче үнген. Номда уругларга шүлүктер, баснялар, баштак чугаалар, тывызыктар кирген.

#культуратувы #библиотекитувы #чуковка17 #Соскалдай #90лет #юбилей